Hebrews 3
E Isu i Dagi ne Moses
1 aMua o huriki a turagu, a Vure i gale hita. Mu luhoia e Isu. A Vure i rudu vilia, ge ia a Prister Dagi na lotu ne hita. 2E Isu i rata lobo a leho a Vure i habi vona, i manga e Moses tara i rata a leho lobo a Vure i habi vona. 3A roho takutaku ri tahoka a viri i hae. I mavonga kunana a Vure i ratarike a maki lobo. A viri i hae a roho, a rana i dagi hateka vona a roho i haea. I maea kunana, a rane Isu i dagi hateka na rane Moses. 5 bHosi e Moses a vora na Vure, i rata lobo a leho a Vure i takia ge ratea, i matakari e huriki a tara na Vure. E Moses i rata mavonga, i vakasiri muga i muholi a ngava a Vure ta ge taki muri ma. 6Pali e Kristo i uka ma ia a vora. Ia a Tuna Vure. I matakari kamumu e huriki a tara na Vure, i manga e Tamana i ngarua ge ratea. Hita bara si pesi tata ni luhoi torea a Vure, ni pasimata vona a maki a Vure ge rata ne hita, bara hita e huriki a tara vona.7 cI manga a ngava a Hanu Kiripiripi hosi i taki,
“Mona na tahuna mu longoa a Vure ge taki mua,
8 dnahea mu gu putu ngingi
i manga e huriki e tubune mua hosi, ri longotaro a ngavana Vure,
ri laho viliha na malala golea,
ri tonia a Vure.
9 A rata a maka nivakasiri dagi na matane ria na pida i ravulu va,
pali ri tabana ni toni iau.
I mavonga, a rihate ne huriki nga, a ta maea,
‘I uka ma ri lohoka vona a narogu.
Ri lohopile vakaroro iau.’
11 eI madihi a hategu ne ria,
lakea a kaba, a ta maea,
‘I muholi hateka, i uka ma ri gi dili na tanga na nimalo nau.’”
12Mua o huriki a turagu, mu matadoko, ma ge rata mua a niluhoi hale, mu gu lobo ni luhoi torea a Vure, mu gu ngalahere na Vure Mahuri. 13Na parava mona mu vatuhori, mu vakatora a niluhoi ne mua na parava vakaroro, ma ge tami mua a naro hale, mu gu gigi tora. 14Na tahuna si luhoi tora karabea e Kristo, i gale hita e huriki e turana. I mavonga, si gi pesi tata ni luhoi torea, ge vano, ge harena na parava si mate vona. Bara i uka, i uka ma ge gale tabu hita e huriki e turana. 15 fI manga a ngava ni here puru hosi na Hinere i ta maea,
“Mona, na tahuna mu longoa a Vure ge taki mua,
nahea mu gu putu ngingi
i manga e huriki e tubune mua hosi, ri longotaro a ngavana Vure.”
16 gRe huriki nga, e Moses i vakamariu tala ria o Egipto na nitora na Vure, ri longoa a ngavana Vure, pali i uka ma ri longototoa. Ri longotaroa. 17 hRi ratea a Vure, i madihi a hatena na pida i ravulu va. Ria kunana ri rata a naro hale, ri mate na tabeke i ngeki. 18I taki e huriki nga, ra ri longotaroa a ngavana, i uka ma ri gi dili na tanga na nimalo vona. 19I mavonga, si matakilaka vona i uka ma ri dili, a vuhuna i uka ma ri luhoi torea a Vure.
Copyright information for
BNP